Stat crux dum volvitur mundus
I sad tu smo jopet noseć svo brimênje,
čekajuć od mira novo navišćênje.
Povidaju vitri:
Svud kadi su s križa teple kapi pale.
zasos’ će nad mrazon od sunca sopìle;
laz pod mrazon ìščuć
pod bàbinin pâson,
već restu mež lišćen vazmènčice bile!
H tebi restu, Meštre -
ljúbeć blagoslôvnu ovu teplu grudu;
h Tebi... ki znaš vicije od srca i droba:
kroz brajde do ulik, do Petrova jidra,
do nedìlje svete od praznega groba.

Dan kad blažen dojde ontràd
- rod od Eve -
krstjàn će sve lanče u srpe refàti
- Proròk tako piše -
i sablje u svitle pluge prikovàti.

Dižuć vrime Križ će ki je sve škuríne
h pozdòlnici stira h sùmpornemu kraju,
zablišćàt prid tronon vrh duba u raju!
Di čovìk i ženska sisti će pod ruzu,
gola svoja tila ne skrivajuć više,
a Ti ćeš njin ki si zvizde učinìja,
kad sve novo bude
otrt svaku suzu.

Ovo suho drivo, ovi gnjili čavli...
Krozâ nje će Misec i Sunce pasàti!
Kroz Besìdu ča je prvi mot levàla
i sve joj kroz vike na kup se tornìva.
Čovìk će čovìka u njoj pripoznàti.

Via dolorosa - Passio gloriosa!
Jena greda duža, jena staza kraća:
Stojî križ na groti, dok se svit obràća!

Ova web stranica koristi kolačiće

Ova web stranica koristi kolačiće radi što boljeg iskustva posjetitelja stranice. Klikom na poveznicu 'Informacije' saznajte više o kolačićima. Klikom na poveznicu 'Prihvaćam' potvrđujete prihvaćanje kolačića na ovim stranicama.